I'm Anele Ramabele
UUAnele Ramabele uzalelwe eGreenbushes kwisithili saseMduluswa. Uzalwe ebutsheni beminyaka yoo1980 ezalwa nguMamKoena intombi yakwaMapetu noyise uDlamini umfo wakwaRamabele (ongasekhoyo). Uzalwa nabantakwabo abahlanu noodade wabo abasixhenxe engunyana wokugqibela yena. UAnele ukhulele eMotherwell ekhulela phantsi kwesandla esinothando sikamakazi wakhe uNose. Ufunde amabanga aphantsi kwizikolo ezahlukeneyo ukusuka eGreenbushes kodwa uyogqibezela amabanga aphantsi eCoega Primary School. Wagqithela wayokwenza aphakamileyo eMfesane Senior Secondary School kwalapha kule lokishi idume kunene yaseMotherwell. Emveni koko uye waqhubeka wayokufunda eNelson Mandela Metropolitan University, elinga iLLB. Uye wenza nezinye izifundo ezifana neAssessor course neFacilitation ukubalula nje ezimbalwa.
Umfo kaRamabele sekulithuba wazibandakanya namaphulo okufunda nokubhala. Usebenzile nababhali abafana noMadoda Ndlakuse, Dr. Nompucuko Zakaza, Nolubabalo Rani, nabanye. Lo mfo ungomnye wabasunguli beIsixhosa Storytelling Explosion, uye wabandakanyeka nakwiphulo lokubalisa amabali elithi Kwathi ke kaloku ngantsomi.
Le ndedeba idlale indima enkulu ekukhuthazeni ukufunda nokubhala kubantwana abasakhulayo nasezikolweni izibandakanya kwakunye noNal’ ibali, uMasikhulisane kwakunye neRhodes University Centre for Social Development. Ukhe lo mfo wayifumana nenyhweba yokuba akhe athethe ngemisebenzi yakhe, nendima ayidlalayo ukukhuthaza ilitheresi nakumajelo osasazo lukazwelonke nakwiingqungquthela zeLitheresi ezifana neLitasa. Lo mfo kaRamabele sele ilithuba ezithandela ukubhala imibongo kwaye uyawabhala nawo amabali amafutshune agxile ekukhuthazeni abantwana nabantu abadala kwiimeko ezigudle intlalontle yabantu ngokubanzi.
