-
Akwaba Ndandinimamele
Mlesi kubalukile ukukwazisa ukuba le mibongo uza kuyifunda isekelwe kubomi obundingqongileyo neemeko ezichaphazela mna ngqo ebomini. Le ncwadi isondele kakhulu entliziyweni yam, ikuthatha ikubeke kwimpilo yam neyabo basondeleyo kum. Ndikhe ndanazo iimpazamo eziliqela ekukhuleni nangoku sele ndimdala; le ncwadi ke ichankcatha kanye kwezo meko injongo ikukufundisa nokuba inike ithemba. Ezo meko zibangele ukuvela kwesihloko sale ncwadi esithi akwaba ndandinimamele kuba kaloku iimeko ezichatshazelwa yile mibongo iqulathwe apha ziyakubangela ukufa okanye ukuphelelwa lithemba kwabaninzi. Uakwaba ndandinimamele ngumbongo okwalapha encwadini kwaye uza kuzivela ngokwakho ukuba ungantoni na. Le ncwadi inikezela ithemba kwabo sele beqalisa ukuphelelwa lilo nokuba sazi ukuba AKULAHLWA MBELEKO NGAKUFELWA!
-
Amazwembezwembe Obom
Abazali ababini uLuvuyo noNokwanda bakhulisa abantwana babo abathathu, uNgqiqo, uZumange noIviwe, bazame kangangoko ukuba bafunde, babenempilo engcono. UIviwe, uye waphuma ecaleni, ngenxa yeempembelelo yezihlobo zakhe. Uye wagaxeleka kwiziyobisi engaqondanga, nto leyo emenze wazibona sele butshintsha kakhulu ubom bakhe.
Ibe lusizi kakhulu imeko yakhe kuba uphile iinyanga ezinizi ehamba ngesitulo esinamavili, engakwazi nokuthetha kuba ilizwi lalingaphumi.
Ukugula kwakhe kuye kwayichaphazela lonke usapho lwakhe kuba naye umama wakhe uye waguliswa kukugula kwakhe. Latshona emini ilanga kusapho kuba bathe besajonge eyokugula kukaIviwe, kwagula nomama wabo. Wagula umama,wade wayibeka phantsi inqawa. -
Chuu Ngcembe Ngemibongo
Amaxesha amaninzi xa kubonwa umntu ozihambela indlela yakhe ethe chuu iba ngathi kukho ndawo ashiyeka kuyo. Iba ngathi olu hlobo ahamba ngalo luyamcothisa ezintweni de ibe ngathi uthatha kade. Abanye wofika bemsizela bemvela bemcingela nokumcingela bethu. Ukuba ungafumana nje inyhweba yokuba ubone intunja yoko kusengqondweni nasentliziyweni yakhe ungothuka ufe isiqaqa.
Ethe chuu nje uxakathe nto wena.
Ethe chuu nje ukude ngengqiqo.
Ethe chuu nje akathanga chuu ncam.
Indaba yotyelo ayikholi, yonwabele mfundi nayo le incwadi yemibongo kaZizi.
“UZizi uzithele chuu ngcembe okomkhuhlane wexhego ungxamel’ ukundixaka kunjalo nje kuba usuke wagwev’ eXerha kolu bhalondini lweencwadi. Sithi sisajonge imibongo abe esiphakela amabalana. Nqikani ke babhem nive iBhayinari ukuba lisiphakele ntoni na kulo vimba walo uphuphuma bubomi.”
(ilizwi likaMzoli Mavimbela, umhleli nombhali weencwadi zesiXhosa waseSajonisi). -
Ibhekile
Le yincwadi equlethe imibongo elichiza lempiliso ebhalwe ligqala likamakad’ ebona. Yonke ibhalwe ngolwimi lwesiXhosa esilula nesisulungekileyo. Injongo yale ncwadi kukonga nokulondoloza ulwimi lwethu lweenkobe. Le mibongo ichaphazela imiba eyahluke kakhulu, uya kufumana imibongo ethetha ngendalo, ngeziganeko zobom, enye injongo yayo kukufundisa, ukonwabisa nokuhlaba ikhwelo ukuze isizwe sethu singalahleki ezandleni zethu. Eminye yale mibongo isondele kakhulu entliziyweni yam; mibongo leyo ifana nothi IZANDLA, UBIZO njalonjalo. Ekuqaleni komnyaka ka-2021 unyana wam u-Olwethu walimala kwingozi yemoto waphantse ukunqunyulwa isandla. Loo nto yandicingisa nzulu ngezandla, xa ndandimbona engakwazi ukwenza izinto ezininzi ebekade ezenza lula.
-
Iingcinga Zendoda
Le ncwadi yemibongo, ‘Iingcinga zeNdoda’ ichankcatha kwizinto ezisondeleyo kum ezimbanjeni. Ndingabalula kuzo uthando, ukungathandwa, inkathalo, umonde, ulwazelelelo, uxinzelelo, inkxalabo ngemeko-bume umntu azibhaqa ekuyo eyedwa erhangqwe lusapho lwakhe okanye lwakowabo nezinye ke bethu izinto esidibana nazo ebomini. Kukho ukukhula nokuxhokonxwa bubomi uthi usathi uyaphefumla suke kuthi gqi ubhubhane weCovid-19. Tsi! Bafondini izinto zomhlaba! Masifundeni nantsi imibongo ke nto zakuthi sitye sibhukuxe. Inkxaso yenu inene ixatyisiwe kakhulu eMdantsane kwikomkhulu lamanqindi.
“Imibongo ephuphuma ubom enikeza ithemba kwabo bantliziyo zidabukileyo, zikrunekileyo nezidakumbileyo. Funda uzivele mfundi, inene awuyi kukhohlwa uza kukholwa, indaba yotyelo ayikholi” (ilizwi likaMzoli Mavimbela, umhleli nombhali weencwadi zesiXhosa waseSajonisi). -
Iingqondi Zeqhagqiwa (Umqulu KaNdlelantle)
Abantwana bethu abalelanga kulelwe nje bona bayabhala. Kha wuzivele oko kuvela kwiintsuba noovimba babantwana abaphuma kumakhaya ngamakhaya alapha kwilokishi yaKwaNobuhle.Naba abantwana bephuma into ngomlomo besibonisa isizathu seenyembezi kwabaninzi bekwaxabangela umxoxozi wokomelela phezu kwazo nje iimeko ezibuhlungu abagaxeleka kuzo.Ubomi abunamfobe ke tana kodwa sekunjalo ezi mveku zisebenzisa usiba ukulwa nosizi zizingela iindlela zokuphila nokuqonda amajingiqhiwu obomi.
-
Indoda Ayikwazi Kuba Yinkedama
“Emva kokuyifunda, ndinambitha ubuncwane bayo, ndizive ndidanduluka ndisithi liyinene elithi ‘abantwana likamva lesizwe’ kuba ikamva lesizwe sethu, ngakumbi esi samaXhosa, liqaqambe kakhulu ngenxa yalo mbhali, osele ephum’ izandla, ewola namawonga ngamawonga ngenxa yokukhalipha kwakhe ekusebenziseni usiba, ebhala isiXhosa. Thatha ke iitshefu zibe mbini phambi kokuba uhlale phantsi, ufunde. Enye yeyokosula iinyembezi zentlungu, enye wokosula ngayo iinyembezi zolonwabo, ngenxa yoburharha balo mbhali.”
– Gqirha Hleze Kunju
(Umphathi kuBugcisa Bokubhala, kwiYunivesithi iRhodes.) -
Isibane Kwintsunguze
Imibongo engamashumi amathathu ekule ncwadi iza kulilisa, incumise iphinde ifundise komdala nomncinane. Oyifundayo uza kuzibona ephila kwilizwe lombhali ngethuba ebebhala le mibongo ngalo. Yanga ngokuyifunda kwakho ungathunakala, ngaxeshanye ube unyangeka izilonda zomphefumlo. Nasi ke isibane kwintsunguzi okuyo. Khanyisa sona uzinyange, kutsho kudede ubumnyama kuvele ukukhanya!
“USimmy yimbongi, uSimmy yimboni kuba ngumfo ovuthelwe ngaphakathi okwendlazi; umf’ oqulungen’ okwerhamba. Whena! Wabulaw’ apho. Ude wayophula nkabi, kwakukudala kakade ndisithi ‘buya ekamereni kwa-Avbob Poetry uze kumakhwenkwe amakhulu’. Phantse yonke le mibongo iyimvula-mehlo, sisikhalo, kukophela ngaphakathi kwembongi ze kuphile omameleyo xa imbongi iziphalaza. Injalo ke inkokeli, kufa mnye kuphile baninzi. Mandingawafinci kuba kakade isigananda sifincwa ngamagqala. Nqikani nizivele, selani nibhukuxe, yeyenu le mvaba” (ilizwi likaMzoli Mavimbela, umhleli nombhali weencwadi zesiXhosa waseSajonisi). -
Ithunga Lengqiqo
“Imibongo elapha isukela ngexesha iimbongi namachule ethu ebon’ ilanga. Ungacingi ukuba kuphelele apho unani na kakade? Mfondini kutyhutyhwatyhutyhwa amaqhina neenduli ngobomi isakhono sisonke nantsika. Xa ndikuhlebela wena mlesi ndingathi lungisa intliziyo uyenze yomelele kunjalonje ngokuba kaloku iza kuxhumaxhuma uxakane nayo hayi nje kancinci. Ababhali basixeko saseGqeberha bekhatshwa ngomnye osuka eQhagqiwa babhoke isicuku bafun’ intw’ ibilapha. Ndizama ukuthi akufihlwa makhuba kulinywa kule incwadi. Inyaniso ikhutshwa ngobunjalo bayo. Ukuba isilonda sakho siyathunakala xa ulesa ikhona imibongo engumathunga kwalapha. Babhali baseBhayi ndinothulel’ umnqwazi inene. Chophani nithi nqwadalala niyonwabele. Ndiqinisekile ukuba nakumathala eencwadi le incwadi iya kubanencasa yevatala. Le ncwadi inene ikwelinye inqanaba.” (Ilizwi likaMadoda Ndlakuse – umhleli nombhali waseBhayi)
“Iimbongi ezineliso nomqaphela kwimiba edla umzi kaXhosa. Inene ababongi bayagqabhuza, whena! Wabulaw’ apho!” (Ilizwi likaMzoli Mavimbela – umhleli nombhali weencwadi zesiXhosa waseSajonisi) -
Izitshanguba Zentlalo
Izinto ezisingqongileyo ekuhlaleni inene aziyonto nje enokuthatyathwa lula. Ziliqela ke izinto ezisetyenziswa ngabantu ukuze banyange ezi zitshanguba zingakhethe mntu nasiduko nakufuma kwesipaji. Abantu abafana nam ke abayiyeki tu into yokubhala imibongo ukuze loo ntlungu ibangelwa zezo zitshanguba ikhe isuke nje kancinci ibaphe umtyhi.
Le ncwadi ibhalwe ngexesha lentlungu engathethekiyo kumntu wonke iCovid-19. Sithe sinemithwalo yethu kakade kwavele kwathi gqi isigebengakazi esishiye amakhaya eziintsalu. Andikwazanga tu ukungaphawuli ngale ntlekele apha, ngethemba lokuba niza kuyonwabela le ncwadi. Makutyiwe ke noko ngoku kudala oku kutya kubondwa.
“Imibongo ezoba imifanekiso-ngqondweni ngobuchule obungaphaya komlinganiselo. Yiva nje imibongo efana nale: NGASESPORWENI EDEAL PARTY, INDODA EHLAMB’ IZITYA, SOZE INDODA INGAKHALI (I) no (II), LIHLE IBHAYI EBUSUKU, IVILA LOMBHALI, EDUTYWA EDOLOPHINI ndibala ntoni na. Mna ndithi intlalo yethu izele zizitshanguba ezifuna ukucocwa. Njengoko le mboni yakwaZizi sel’ iyihlahlile indlela nathi babhali nabafundi masizeke mzekweni, singen’ efolweni sicoce ezi zitshanguba; izitshambuluka ke ngokwasemaMpondweni kuwe Lawundini” (ilizwi likaMzoli Mavimbela, umhleli nombhali weencwadi zesiXhosa waseSajonisi). -
Mhla Latsh’ Ibhayi
Isihloko sale ngqwebo sithi, ‘Mhla Latsh’ iBhayi’ into ethetha ukuba kuza kwaziwana. Nangona kusaziwana kunjalo ke, ubukhulu becala amabali la ayacaca ukuba umbhali ziingontsi namasuka-ndihlale ahlangene nawo kulaa mimandla ikuMneno-Nciba kwatsho kwaqandusela la mabalana angcathu ancindi ivuzisa izinkcwe. Ubukhulu becala ngamabali la ayimvula-mehlo ukuba, ‘okuze buponi kotshabalala, okuze ngamathontsi kozinza,’ njengoko oko uya kukufumanisa kwimixholo yamabalana afana no‘INENE ULUNTU NGEZISULU’. Akhona amabali oya kuwafumanisa esityhilela izizeka-bani zoxinezelelo lwengqondo kubani, ngenxa yobugewu awathi wabhungca ngezikaSibi kubo, mabali awo afana no‘ENDLELENI EBUYA E-ADDO’. Masingafinci ke bantakwethu, nqikani nizifincele. Kakade iqwela nesigananda sifincwa ngamakhwahla namagqala.
“Amabalana anonambitheko okomsindleko kumhambi, adiza ilihlo lokhozi kumbhali olirharha nonosiba olunyumbazayo. Ebalisa nje uyahlekisa kodwa uyafundisa. Mna ndithi qha, Zizi elimnyama neenkomo zalo zabalaza mzala womntu amathunzi anabile kukud’ eBhayi, malitsh’ iBhayi!” (ilizwi likaMzoli Mavimbela, umhleli nombhali weencwadi zesiXhosa waseSajonisi).‘UMhla Latsh’ iBahyi’ uphumelele iMbasa yamaBali amafutshane kaNadine Gordimer yowama-2021
-
Mholweni – igama lam ngu-Owethu
Le ngqokelela yamabalana amafutshane abantwana iyonwabisa kwaye ivula amehlo kwiintsatshana ukuze zihlale zivundlile okomvundlana othile, eqakatha eqakatha engena entsimini. Emafutshane enjalo amshiya elenceza ulwimi umfundi kube ngaske bekungabaliswa kubhekwe phambili. Fundani nizivele.
“Mholweni igama lam ndinguMzoli, ndiza kuba poni ke kuba nombhali ondibalisela kamnandi namhlanje – u-Onez ushort and sweet. La mabali embalwa enjalo amnandiswa kakhulu nayimizobo ebalisa ibali yona kuqala. UZizi uzizele apha ku-Onez, akachulezi, gxebe akacikozi lho mntakaZizi sundifundekela! Le ncwadi ubumnandi bayo bundikhumbuza ekaGqirha Sindiwe Magona ethi, ‘Cula’. Khuphani iisenti zenu ke ‘niculele ibank account’ ka-Onez atsho akhuthazeke abhale nangakumbi, akhule abe njeyaaa kuncwadi. Tshisa Onez kwezo ndawo maan!” (ilizwi likaMzoli Mavimbela, umhleli nombhali weencwadi zesiXhosa waseSajonisi). -
Ndisindiswe Sisihobe
Ndimncinci ndimngaka, endidlule kuzo zibubukhulu bungaphaya kweZulu. Ndingabalula ni na, ukuntlontwa, intakatho, umona, ukubangaphantsi kwimo yentlalo kunye nokuxhatshazwa. Kuzo zonke ezo mpi ndiphume ndiliqhawekazi ngokuncedwa sisihobe, ukuthetha nokuphikisana nobumnyama, uburhalarhume obuvame ukubasisiqhelo kwabamiqolo igoso. Kazi nisikhomba phi na xa nisithi masibuyel’ eMbo? Zingcamlele nawe ngokwakho kulo mbele womXhosakaz’ ongagxunyiswa nditsho nazizixhiliphoth’ eziqamele ngamaxhwele.
“Yonke imibongo yale mbongi inamandla kwaye iya kuchukumisa izazela iphilise nezizwe.”
(ilizwi likaMzoli Mavimbela, umhleli nombhali weencwadi zesiXhosa waseSajonisi) -
Ndiyaqal’ Ukuyibona Le
Le yincwadi yamabalana amafutshane neye yachaphazela kanobom imiba enobuzaza phakathi koluntu. Umbhali ukhupha imbilini yakhe engagogotyanga lutho ngezinto eziliqela esithi sityhubele kuzo kwiindawo esihlala kuzo. Bali ngalinye liyakholeleka, lidlwengula umxhelo likwadlikidla nesimo sengqondo esimele sibe naso kwizinto ezisingqongileyo nesizibona qho. Umbhali ukholelwa ekubeni la mabali anako ukukhulisa iingqondi ezithe qwa kwaneencoko ezakhayo eluntwini.
“Ewe izinto azifani nyhani Zizi kwaye nam ndivuleke amehlo njengontlalontle, kunjalonje ndiyifince nzima iediting yale ncwadi ngoba bendimana ndisima ndibe nomsindo nokuchukumiseka kwezinye iindawo. Mandicaphule ibali lokuqala – kulusizi ukufumanisa ukuba amanina athile, hayi onke, ayabankula abayeni bawo abababona njengamabunga, emva kokubakhukhuza ubutyebi neemali zabo. Isiphelo sikaNgwadluma sokugajuzwa ngumnk’ akhe, de awe qikili phantsi abhubhe abantu bejongile ngenxa yoxinizelelo lwengqondo sindichukumise kakhulu Zizi. Akwaba ke la mabali amnandi kangaka, nayimvulamehlo yokuba ‘ezi zimanga sizenzayo siluluntu masiziyeke’ angaselwa iso sithi ngokuba kaloku, ‘zigqitywa kuhlwile zibonwe liwuhlabile’. Tshotsh’ ubekho sekaMila noOnez.” (ilizwi likaMzoli Mavimbela, umhleli nombhali weencwadi zesiXhosa waseSajonisi). -
Ndiza Kutshat’ Ubeyonce
Le ngqokelela yamabalana amafutshane iphicotha imibandela yokuhlala embaxa nexananazileyo. Imalunga nezigqibo ezithatyathwayo neziphumo zazo. Igubhulula izinto ekungafane kuthethwe ngazo. Injongo yombhali ngokwenza oko ‘kugubhulula’ kukwakha, ukulumkisa nokukhulisa ukuba ziingqondi kwethu bafundi beencwadi. Yifunde kunjalo nje soze uzisole.
“Liphinde labuya iZiz’ elimnyama neenkomo zalo, gxebe iincwadi zalo, kaloku akufuywanga eGqeberha, gxebe eKariyerha. Hahaha! Ndiyakudlalisa Dlamini mbhem eeh, awudlaliswa na wena uyimali? Okwam kuncinci kukuthi nje nam ndizitshatele uBeyonce wam ngamava endiwafunde kumabalana athi, “UNOMAKHENYA” nelithi, “NGUMNTU WAPHI LO?” nawe khawuzikhangelele owakho uBeyonce kolu cwambu lwamabalana amade kodwa angengomdintsi wendinisa etsho ngomsina-ndozele ekwenza ulibale isiqalo nesiphelo sebali. Hamb’ uhambe Zizi ungabi sabhek’ emva mbhem.” (ilizwi likaMzoli Mavimbela, umhleli nombhali weencwadi zesiXhosa waseSajonisi). -
Nganeno Komlambo Iqhagqiwa
Le ncwadi ikhupha uvimba ovela kwiintsuba zabantwana abaphuma kumakhaya ngamakhaya.
Ngamachule la ekudandalaziseni iimeko zabo zemihla ngemihla. Khawusondele nganeno komlambo iQhagqiwa ufumane isihlalo uchophe ze ufunde le ncwadi. Andiqondi ukuba uya kuzisola ngaphandle kokuba awuthandi ukuphulaphula ilizwi labantwana.
(Ilizwi likaMadoda Ndlakuse – umhleli nombhali waseBhayi)
Uhlobo loncwadi olunqabe kakhulu apho usatshana oluselula lunikwa khona iqonga lokuphalaza imbilini yalo ngale ndlela luziva ngayo. Ingumxube wesiXhosa nesiNgesi nemizobo injalo, ityebe iteketeke; zisikeleni izihlunu eziya kunihluthisa kulo mbengo babhem, mna sendihluthi mpuu.
(Ilizwi likaMzoli Mavimbela, umhleli nombhali weencwadi zesiXhosa waseSajonisi) -
The Road To My Destiny
The is the story of a young girl who was given up by her birth mother as a young child, and raised by her father’s family. They then turned on her and rejected her when she started to ask questions about her birth mother.
It is the story of her struggle to come to terms with this rejection and to recover her self-worth.
It is the story of how she found strength and encouragement in her worship and in the support of her Spiritual father, the Prophet of the Consecrated Congregation of Christ International Church (CCCIC).
She ends by calling on children in similar circumstances not allow their negative circumstances to influence their lives or affect their self-esteem. A truly heart-wrenching story. -
Ukuphuma Kwelanga
Ukuphuma kwelanga esi sihloko sibonisa ukuqala kwemini ethi ibe lithemba kumntu atsho abe namandla okukwazi ukumelana nemingeni yemini. Emva kwesifingo sobumnyama kuye kuthi qheke ukusa. Ebomini uye udibane nabo ubunzima kodwa kufuneka umntu ahlale enethemba lokuba nakobakhe ubom kuseza kuba khona ukukhanya. Lo nto ithi kufuneka ubani asoloko ehleli ethembeni. Le ncwadi iqulethe imibongo amabali amafutshane kunye neentsomi ezithi zinike ithemba nakubani oziva edangele atsho afumane ithemba. Inceda ubani afumane izakhono zobom. Apha uza kufumana umbongo othi uRonta onika ulwazi kulowo ungazange wahlala kuwo. Namabali amafutshane endingabalula ibali elithi bagotywa bebatsha elingomzukulwana othi ngenxa yokusoloko ehleli nabantu abadala aphele ethetha izinto ebekungafanelekanga azithethe. Le ncwadi iyonwabisa iyahlekisa kulowo uthe wathatha ixesha wayifunda.
-
Ulwimi Lwam, Igolide Yam
Ulwimi Iwam igolide yam yingqokelela yemibongo eveza indlela umbhali aziv ngayo ngemeko ekuyiyo elizweni. Kuchatshazelwa iinkalo ezahlukeneyo zobomi. Umbhali uhlomla aveze izimvo zakhe ngamava akhe nezinto adlule kuzo ebomini.
Kwezinye zazo singabalula ezothando, ezopolitiko, imo yolwimi isiXhosa eMzantsi
Afrika njalonjalo. Yinqike ke mfundi uzivele le golide yolwimi Iombhali.
“Imibongo ehlaba umxhelo etsho kuthambe neengqaqambo zomphefumlo. Ubukhulu becala ivuselela ukuxotyiswa kwesiNtu nesiXhosa ngamaXhosa. Tshotsh’ ubekhono somaqhulo wethu mbhem ngokuthi uPhembe le ntlantsi icimayo kufundo nothondo lweencwadi zesiXhosa.” (ilizwi likaMzoli Mavimbela, umhleli nombhali weencwadi zesiXhosa waseSajonisi). -
Umbulalazwe
Le mibongo ikukutya kwabalambileyo, ingumthuthuzeli kwabakhathazekileyo, ingumthombo kwabanxaniweyo, kwaye imixholo yayo yonke igxile kumbulalazwe iCOVID-19. Yimibongo le enika ithemba kwabo baye bagaxeleka kulo bhubhane, ikwathuthuzela nabo baye bashiywa zizihlobo zabo ngenxa yawo.
“Siyavuya Mnu. Qeqe mbhem ngokuba usiphakulele kuvimba wakho weengontsi othe waziphawula ngalo mnyakandini wembubhiso wekhorona, u2020. Zimbalwa kakhulu iincwadi esezibhaliwe ezigwadla lo mcimbi ungumbulalazwe. Kwanga ke ngale mbalo uluntu lungaziqoqosha luzibhence luzeke mzekweni ngokuheshela kude lee ikhorona imke tu kumzi kaNtu.”
(ilizwi likaMzoli Mavimbela, umhleli nombhali weencwadi zesiXhosa waseSajonisi.) -
Umkhumezelo – Umqulu 3
Nanko ke mfundi wesihobe umqulu wokugqibela kule ncwadi ithi, “Umkhumezelo.” Apha ufunde imibongo eyahlukahlukeneyo. Kweminye ndiyaqiniseka uzakhele umfanekiso-ngqondweni wezinto ezininzi. Lo mqulu ke ungene nzulu kwiimeko zokuphila ekuhlaleni ngokubanzi. Eminye imiba kungenzeka ukuba iyakrwempa kodwa ke into emasiyivuyele kukuba ivelele iinkalo eziliqela esizaziyo ukuba zidinga ingqalelo emandla. Ndiyayazi ke mfundi ukuba mna ndodwa andinakufikelela zonke iinkalo obunga unganqwenela ukuba ndizifikelele.
Baninzi ababhali endikhuthaza ukuba ufunde iincwadi zabo zesihobe ingakumbi abalemihla abo sele belupapashile uNcwadi lwabo. Injongo yethu inye kuNcwadi lwethu asikhuphisani kodwa sisebenza kunye ukuze kuzuze wena. Akwaba ungasixhasa singaba babhali sisebenza nzima ukufundisa wena silondoloza ulwimi lwethu.
-
Umkhumezelo Umqulu 2
Bathandi boncwadi ndithi kuni yonwabelani lo mqulu, endiqinisekayo ukuba uza neenguqu kuncwadi lwesiXhosa. Izimvo endizivakalise apha nezinto endizibhale apha maziphikiswe ngulowo ukwaziyo, aze lowo uvumelana nazo avumelane nazo. Uza kukhumbula ukuba kaloku namphi na umntwana uye anxibe izihlangu ezingalinganiyo okanye azigqwethe naye elinganisa ngamanye amaxesha. Umbone unkabi elinganisa utata wakhe xa ehamba naxa ethetha ufike umfo omkhulu ezikhotha nemifinya le yembala, okanye ufike umfo ehamba ezibhenca efake nezandla ezipokothweni ukuba unconyiwe ukuba unxibe kakuhle. Nalapha ke kule ncwadi usengafumana izinto ekumnandi ukuzamkela nezikuchaphazelayo, kodwa ke ngamanye amaxesha ndingaqondanga ndisenokukudanisa njengomfundi.
Yonwabela ke ukufunda izishwankathelo, iinkcaza ezinabileyo, imibuzo nophando, kanti neeprojekthi zomfundi. Ukuba ngaba ootitshala banqwenela inkcazelo engakumbi kunale inikiweyo kulo mqulu, bangabhalela kwi-email echazwe kwiphepha lale ncwadi. Kwanga ungawonwabela lo mqulu wesibini mlesi kwemithathu yosiba lwam.
-
Umthubi
Le ncwadi yeyemibongo yesiXhosa. Yincwadi yam yesibini enjongo zayo zikukuqhubeka ndidlala indima yokuphucula, ukufundisa, ukulondoloza, kwaye nokonga ulwimi lwethu. Ndinelizwi elincinci elihleli lindikhumbuza ukuba mandidlale indima yam ekuphuculeni ilizwe lethu ukuze abantwana bethu nesizukulwana sethu sibe nako ukuphila ubomi obububo. Ndihlaba ikhwelo ndikhuthaza nabani na oneendlebe ukuba adlale indima yakhe ukuze ashiye umzila nomqela othe qabavu ukubonakala nokucaca oku. Yeyele ke mawethu khaniyonyule nakweli tyeli.
